Boukelisk

Boukelisk (de. Bokelesch; loangleeken hat dät "Boukeliesk", unner Froamdienfloud uk "Boukeläsk") is ju noudelkste Buurskup fon Seelterlound. Uumdät dät deer een oolde Johanniterkommende rakt, wäd ju Buurskup mongs eenfach "Klaaster" naamd.

Ju Johanniterkapälle

Loage

Ju Buurskup läit noudelk Uutände, wäästelk Baalenje un Bieuwelte un aastelk Ubbehusen.

Noome

Ju Buurskup häd dän Noome Klaaster fon dät oolde Johanniterklaaster, wierfon ju Kapälle noch stoant.

Geskichte

Skoule

Ju katoolske Foulksskoule fröier

Ju oolde Skoule, 2012

Siet 1674 waas deer ne Skoule in Roagebierich in ju Klaasterkommende Boukelisk. Leeter hiede dan Boukelisk ne oaine katoolske Skoule. 1786 wuude begjucht, dät deer n Koaster in Boukelisk anstoald waas. 1848 häd Paachter Thoben ne Koomere an sien Huuus anbaud un foar 11 Rieksdoaler in't Jier ferhierd. 1872 roat dät Unnnergjucht in dät Huus fon Paachter Hinrich Ahlers.

1874 wuud ieuwenske ju Kapälle ne näie Skoule baud. In dän twäiden Waareldkriech waas fon 1939 - 1945 ju Skoule sleeten, do Bäidene geenen do in do Skoulen fon Elisabethfeen-Wääst af Idafeen. In do Jiere 1955/1956 wuud ne näie Skoule baud, ju deer 80.000 DM kosted häd. Ju Skoule wuud ap n 1.8.1967 sleeten un ferkooped.

Do Koastere an ju Skoule wieren:

Laitenge:

• 1848: Niemeyer
• 1852: Bahlmann
• 1856: Benediek
• 1857: Arnold Bojert
• 1863: Giere
• 1864: Eilers
• 1869: Behrends
• 1879: Warnken
• 1887: Jüchter
• 1891 - 1898: Vornhusen
• 1898 - 1919: Havikhorst
• 1919 - 1924: Josef Bünker
• 1924 - 1935: Reinhold Timme
• 1935 - 1939: Josef Bünger
• 1945: Theo Hinrichs
• 1945 - 1946: Paul Artelt
• 1946 - 1955: Johann Kabella
• 1955 - 1965: Viktor Schraad
• 1965 - 1966: Franz-Josef Thie
• 1966 - 1967: Georg Batke

Molkeräi

Ju oubreekene Molkeräi fon Boukelisk

Fröier stuud der suudelk Boukelisk ne Molkeräi.

Ju Johanniterkapälle

Sjuch uk: Johanniterkommende Boukelisk.

Ju Baksteenkapälle fon ju fröiere Deelläitenge fon dän Johanniteroarden in Boukelisk is uut dät 13. Jierhunnert un is ju eenige fon disse Oard. Aal do uur fräiske Kommenden fon dän Oarden sunt in ju Reformation unnergeen, un do Bauwierke fernäild wuuden. So stoalt ju dän Hl. Antonius wäide Kapälle in Klaasterbusk n kultuurhistorisk Kleenood deer. Ju is nit bloot dät ooldste katoolske Goddeshuus in ju Meente, man uk dät ooldste Bauwierk in dät ganse Seelterlound. In dät Jier 2005 wuude ju apweendich restaurierd.

Die Klaasterbusk

Die Klaasterbusk in n grooten Woold uut Näddelboome un Eeken un is mäd dän Aasterhuser Busk ungefäär 21 Hektoar groot. Truch do Woolde lapt ju Seelter Äi.

Die Klaasterbusk waas siet fröier un aleer n Träfpunkt fon Fräisen un Saksen. Deer wuude Fäi un Weere tuusked un kooped un ferkooped. Oafte blieuwen se deer moorere Deege. As Eende fon dät 19. Jierhunndert do Reede apkeemen, keemen deer uk do Ljude uut do Täärpe uumetou. Dan waas deer n Räädrennen twiske Strukelje un Potshusen.

Pinksterträffen bie Klaasterbusk

Uut düsse Träffen is dan ju Boukelisker Kirmes äntsteen. Duusende fon junge Ljuude uut Seelterlound, Aastfräislound un dät Ooldenburger Munsterlound keemen mäd hiere Reede, Motorreede, mäd Ounhongere un Frachtwoaine tou dät Fäst ap Klaasterbusk. Deeruut wuud dät jierelkse Pinksterträffen mäd ne Donsferounstaltenge (Frühtanz bei Klosterbusch) fon smäidens bit ätter dän Middai. Dät geen noch so bit in do 1970er af 1980er Jiere, bit deer immer moor Diskotheken keemen un dät Pinksterträffen nit moor so interessant was.

Literatuur un Wällen

• LOUND UN NOOMEN
• Franz Dwertmann: Das grosse Sterben der kleinen Schulen, Vechtaer Druckerei und Verlag, 1984, ISBN 3-88441-025-3
• Commons foar moor Bielden.

Ferbiendenge ätter buuten

• Ju Kapälle un Klaasterbusk ap GOOGLE-Maps
• Kapälle St. Antonius
• Fest erinnert an historischen Tag (NWZ 15.07.2010)
• Freude über 50 Jahre Unabhängigkeit (NWZ 13.08.2010)
• Erinnerungen an den Kampf um Unabhängigkeit (NWZ 17.08.2010)