Bäätholt

Bäätholt (düütsk: Bätholt) is ne Buurskup fon Skäddel.

Buurenhuus in Bäätholt, uum 1920

Die Krätseldoabe, 1952. Deer gungt däälich ju B72 loangs

Ju oolde Ticheläi, uum 1920

Ju Skoule mäd Sköilere un Koaster Josef Sieverding, 1925

Loage

Bäätholt lait wäästelk Skäddel, suudelk fon Hollenbround und noudelk fon Heeselbierich. Wäästelk fon Bäätholt läit die Wäästfoan. Truch Bäätholt gungt ju Wäästfoansträite (Westermoorstrasse).

In Bäätholt lääse die Maiglöckchenwoold un die Maiglöckchensee.

Ticheläi

Deer waas ju Skäddeler Ticheläi twiske dät Täärp Skäddel un Bäätholt. Ju Leemdoabe, wier ju Ticheläi dän Leem wächfierde, lait in Bäätholt.

Skoule

Bäätholt hied fon 1920-1969 ne oaine katoolske Skoule. Ju Skoule wuud 1920 baud, uum dät tou betoaljen häd ju Meente Skäddel hiere Määlne foar 35.000 Mark an Wilhelm Hanekamp ferkooped. Ju Skoule hied eene Klasse. Ju Skoule waas n kultureel Säntrum in ju Buurskup un Koaster Tabeling gruundede deer n Trummel- un Floitenkoor.

Fon 1940 - 1950 waas ju Skoule sleeten un do Bäidene geenen ätter ju Skoule in Skäddel. Ätter dän 19.1.1950 waas deer dan wier Unnergjucht in Bäätholt mäd 40 Sköilere.

Ju Skoule wuud ap n 1.8.1969 sleeten un ferkooped. Ju stoant deer däälich noch.

Do Koastere wieren:

Laitenge:

• 1920 - 1930: Josef Sieverding
• 1930 - 1935: Karl Tabeling
• 1935 - 1940: August Krapp
• 1940 - 1950: ju Skoule waas sleeten
• 1950 - 1953: Rudolf Kemmerich
• 1953 - 1960: Kurt Löwe
• 1960 - 1968: Alois Hoheisel
• 1968 - 1969: Elisabeth Glende (Fertredenge)

Soage fon ju Skäddeler Klokke in dän Krätseldoabe

Dän Krätseldoabe waas n Woaterpoul ieuwenske dän Maiglöckchenwoold, deer wier nu ju Sträite B72 lapt. Dät rakt deer ne oolde Soage uur ju Skäddeler Säärkenklokke, do ju Mansfälder Suldoaten in dät 17. Jierhunnert klaue wüülen un do ju Skäddeler deeruum in dän Krätseldoabe ferstopped hieden. Wät deerfon weer is, kon man nit moor uutfiende.

Industrie

• Dät Eedwierk Brinkmann, wät nu tou Griendtsveen heert, häd deer noch n Eedwierk. Do moakje Eed-Briketts foar dän Kaminougend.

Bekoande Ienwoonere

• Wilhelm Awick-Meyer, Buurmäster fon ju Meente Skäddel fon 1946-1961

Ferwiesenge

• Ju Skäddeler Klokke in dän Krätseldoabe
• Ju Skäddeler Klokke in dän Krätseldoabe as Audio-Doatäi
•  Wikisource: Ju Schäddeler Klokke in dän Krätseldoabe – Wällensammelenge

Wällen

• Franz Dwertmann: Das grosse Sterben der kleinen Schulen, Vechtaer Druckerei und Verlag, 1984, ISBN 3-88441-025-3