Theo Griep

Theodor Griep wier n seelter Skrieuwer. Hie is bädden dän 27. Oktober 1916 in Skäddel un waas deer Buur un loangjierich Meeglid fon dän Meenteräid foar ju CDU. Theo Griep is dän 15. Moai 2007 stuurwen.

Griep uut 1958

Dät oolde Fräiske Huus fon Theo Griep uut 1839, Bielde: Th. Deddens, 1952

Ne Hochtied bie ju Familie Griep, 1920

Hie waas aan fon dän Tweelwerräid fon dän oolde Seelterbuund fon 1952. Leeter fäng hie oun tou Seeltersk skrieuwen.

In 1999 häd Theo Griep touhoope mäd Pyt Kramer dät Bouk Seelter Seeken skrieuwen. In dät Bouk sünt aal do oolden Seelter Roupnoomen apskriewen wuuden. Ieuwenske ju Roupnoomen fon Skäddel und Seedelsbierich siet 1820 uut dän Ätterläit fon Pestoor Schulte sunt där uk do oolden Roupnoomen fon Roomelse un Strukelje beskrieuwen. Uk is in dät Bouk dät Äntstouden fon do Skäddeler Buurskuppe truch Theo Griep oarich goud beskrieuwen.

Tou ju Tied uum dät Jier 2000 was Theo Griep boalde die lääsde oolde Skäddeler, die noch gjucht goud ap dät Gebied fon ju Skäddeler Heematkunde Beskeed wiste.

Ju Familie Griep rakt dät al siet dät Jier 1606 in Skäddel.

Wierke

• Seelter Seeken, mäd Pyt Kramer un uurswäkke, 1999. Deer sammelde hie Huusnoomen un Huusriemsele fon Skäddel un Roomelse un skreeuw uk uur ju Geskichte fon Skäddel.

• Twiske Ticheläi un Baarenbierich, Dööntjene, Gedichte un Tiedgeschichte uut un ätter dän twäide Waareldkriech, 2002.

• Die Besiedlung des Dorfes Sedelsberg (ap Düütsk), 2002.

• Uk lääwerde hie moorere Texte foar Marron C. Fort, Saterfriesische Stimmen, 1990.

• 
  Seelter Seeken (Theo Griep un Pyt Kramer, 1999)
• 
  Twiske Ticheläi un Baarenbierich, 2002

Sjuch uk:

• Die eerste Seelterbuund fon 1952, apskrieuwen fon Theo Griep
• Seelterfräiske Literatuur
• Lieste fon do Seelter Roupnoomen

Ferwiesengen

 Wikisource: Seelter Seeken – Wällensammelenge

Ferbiendengen ätter buuten

• Seelter Seeken as PDF-Doatei, hääruutroat fon Theodor Griep un Pyt Kramer. Sälwenferlaach, 1999.
• Ju Familie Griep ap Internet [1].