São Paulo

São Paulo (Amtelk: Cidade de São Paulo) is mäd 12.038.175 Ienwoonere (Stound:2016) ju grootste Stääd fon do Brasilien un fon heel Suudamerikoa. Dät lait in't Suudaaste fon Brasilien, nit fier fon ju Atlantik-Kuste, in dän glieknoomigen Buundesstoat.

Cidade de São Paulo
Statistieke
Ienwoonertaal	12.038.175 (Stound: 2016)
Fläche	1523 km²
Befoulkengstichte	sowät 7389,1/km²
Höchte	760 Meetere
Politik
Lound	Brasilien
Uur
Tiedzone	UTC-3
Koordinoaten	23° 30′ S, 46° 37′ W
Websiede	Internät-Siede fon ju Stääds-Präfektuur

Geskichte

São Paulo wwude ap dän 25. Januoar 1554, dät Fääst fon ju Bekierenge fon dän Apostel Paulus, fon do Padres Manuel da Nobrega un José de Anchieta, twäin jesuitiske Missionoare, bie hiere Missionsstatsjoon Piratiniga gruunded. Ju Missionsstatsjoon hiede hieren Noome fon een Äi tichtebie.

In dät eerste Jier fon ju näigruundede Siedelenge lieuwden deer bloot hunnerd Ljuude.

Tou Beginn waas ju Wirtskup fon ju litje Siedelenge ap Sälwen-Fersuurgenge uutgjucht, eerste in't 17. Jierhunnert wuude Weete foar dän Export ounbaud.

Loange Tied hiede São Paulo heel un aal neen groote Betjuudenge, man in't Jier 1711 kreech dät, uumdät dät goadelk bie aan Pass uur ju Serra do Mar liech, dät Stääd-Gjucht.

Oolde Taksierengen un Tällengen ferräide uus, dät ju Stääd twiske dät Jier 1776, do hiede ju 2.026 Ienwoonere, un dät Jier 1790, do hiede ju 8.000 Ienwoonere, baldoarich gratter wuuden is. In 1817 hiede ju Stääd dan al 23.760 Ienwoonere.

Ap dän 7. September 1822 wuude in São Paulo ju brasilioanske Uunouhongegaid ferkloord, in't foaren hiede dät tou Portugal heerd.

Twisketruch is ju Ienwoonertoal wier toräächgeen ap 12.000 in dät Jier 1840, man uum dät Jier 1850 koom die Koafje-Ounbau ätter dät Rebät, wiertruch ju Äntwikkelenge fon ju Stääd in Foart koom. Fon düsse Tied oun begon ju Stääd tou groien un heerde nit moor ap: In't Jier 1856 wieren dät 15.000, in't Jier 1900 al 239.800 Ljuude. Besunners twiske do Jiere 1880 un 1905 wiedede sik die Koafje-Ounbau noch insen uut, sodät hunnertduusende Buutloundere, foar'aaln uut Italien, man uk uut Düütsklound, Japan un dän Libanon, ätter ju Stääd wai leeken sunt, uum junner ap do Koafje-Plantoasjen tou oarbaidjen.

Juun Eende fon dät 19. Jierhunnert koom Industrie ätter ju Stääd. In't Jier 1913 begon me mäd dän loangjierigen Bau fon ju grootste Säärke, ju Catedral Metropolitana de São Paulo of Catedral da Sé, wier oachteduusend Ljuude oun paasje skuulen. In do 1920er Jiere waas São Paulo mäd sien Uumelound al dät fierende Industrie-Rebät fon Brasilien. Dät look fonsäärm noch moor Ljuude ätter ju Stääd wai. In't Jier 1950 wieren dät 2.198.096 Ienwoonere, un in't Jier 1954 kuude dan uk ju groote Säärke ienwäid wäide.

In dät Jier 2000 hiede São Paulo 10.434.252 Ienwoonere. Ju Taksierenge foar dät Jier 2016 boalt fon 12.038.175 Ienwoonere.

Däälich is ju Metropol-Region uum ju Stääd ju betjuudendste Industrie-Baalengsruumte fon heel Latien-Amerikoa un fon ju Trääde Waareld.