Rio Tocantins

Die Rio Tocantins (toumäts uk Tokantins skrieuwen) is aan sowät 2450 Kilomeetere loangen Stroom in Suudamerikoa. Die Tocantins is mäd een Woaterfierenge fon sowät 11.000 m³/s die grootste Stroom, die bloot ap brasilioansk Rebät lait. Hie is ap sowät 1000 Kilomeetere foar ju Skipfoart tou bruuken, bit Lajeado.

Stroomsysteem fon dän Rio Tocantins

Ferloop fon ju Äi

Die Tocantins äntspringt Midde in dän brasilioansken Buundesstoat Goiás, sowät 100 Kilomeetere wäästelk fon Brasília oun dän Wäästouhong fon ju Serra do Cocalzinho (Serra Geral do Paranã). Fon junner fljut hie haudseekelk in noudelke Gjuchte truch do Buundesstoaten Goiás, Tocantins, Maranhão un Pará. In sin noudelken Middelloop markiert hie dät Skeed twiske do Buundesstoaten Tocantins un Maranhão. Wo liek die Stroom deelfljut, is uunräägelmäitich, dät rakt Stroomsnällen un Woaterfaale. Dät Doal, wier die Tocantins loangsfljut, is maasttieds smäl, dät is man n bitje in dän Brasilioanskne Skild iensnieden. In Goiás wäd ju Äi mäd ju Doalspeere Serra da Mesa apstaud. In dät Rebät uumetou, wier ju Äi dät Woater fon lukt, dominierje präkambriske Steene. In't Suude stounde uk paläozoiske un mesozoiske Steene un un ätter't Amazonas-Bäkken tou Fäästlounds-Ouleegerengen fon't Tertiär. Ju Vegetatsjoon is truch Savannen (Cerrado känteekend un ätter't Noude wai truch tropisken Rienwoold.

Bie São João do Araguaia stroomet dän Rio Tocantins fon links die Rio Araguaia tou. Düsse grootste Sieden-Äi häd een grattere Loangte, fiert moor Woater un lukt sien Woater uut een gratter Rebät as die Tocantins. Niep nuumen, skuul mäd dän Araguaia also as ju Haud-Äi beteekenje. Oun sien lääste Stroomsnälle, nit fier fon wier hie ju See-Hööchte roaket, wäd die Tocantins twiske Marabá un Tucuruí tou'n Tucuruí-Stausee ounstaud. Dät touheerende Woaterkrääftwierk is ätter ju benaamde Laistenge dät twäidgrootste fon Brasilien. Fääre noudelk wiedet sik die Stroom tou een breed Ästuar ap, die in ju smälle Meeresbucht Rio Pará mundet. Suudelk fon dät Ailound Marajó gungt düsse Bucht in ju Baía de Marajó uur, ju sik in dän Suudatlantik eepent. Uur smälle Kanoale, wier bie Äbbe un Floud dät Woater truchstroomet, stoant die Rio Pará uk mäd ju Mundenge fon dän Amazonas in Ferbiendenge. Daach is die Rio Tocantins nit, as dät loange däin wuude, as een Sieden-Äi fon dän Amazonas tou bekiekjen. Dät is n Stroom-Systeem foar sik.