Brasília

Brasilia is ju Haudstääd fon Brasilien. Deer woonje 214.529 Ljuude.

Brasília
Statistieke
Ienwoonertaal	2.789.761 (2013)
Fläche	5.802 km²
Befoulkengstichte	480,827 km²
Höchte	1.172 m
Politik
Lound	Brasilien
Uur
Stiftenge	21. April 1960
Postleittaal	70000-000
Tiedzone	BRT (UTC-3)
*Suumertied	BRST (UTC-2)
Koordinoaten	15° 48' SB, 47° 52' WL
Websiede	www.brasilia.df.gov.br

Geschichte

In 1891 wuude in ju Ferfoatenge fäästlaid dät deer ne näie Haudstääd kuume moaste. In ju Tied waas Rio de Janeiro noch ju Haudstääd. Insteede fon n Haudstääd an ju Kuste wüül ju Regierenge ne Haudstääd ätter dät Binnenlound, ap ne moor neutrale Steede. Ap dän 7. September 1922 wuude die Gruundsteen laid, man fuul moor skaach nit. Präsident Juscelino Kubitschek (1902–1976) häd dan ap dän 22. Oktober 1956 dän Bau ounoardend. Feroantwoudelken Stäädploaner waas Lúcio Costa; die Architekt Oscar Niemeyer moakede as Boas fon dät stoatelke Bau-Amt do Ploane foar do eepentelke Bauwierke.

Ap n 21. April 1960 wuude Brasilia ju Haudstääd fon Brasilien.

Do stoatelke Iengjuchtengen, biespilswiese do Ministerien, wuuden gjucht gau ätter Brasília uumeleeken. Man do Ljuude, do deer ounstoald wieren, wäigerden sik foar't eerste, deer wai tou kuumen. Jo heerden deelwiese tou oolde Sibben, do sänt fuul Generatsjoone in Rio de Janeiro woond hieden. Deeruum sätte ju Regierenge dän 7. September 1972 as Doatum fääst, bit tou dät aal do Stoats-Amtsljuude in Brasíla woonje skuulen, uurs skuulen jo dät Boantje ferljoose. Dät latte in dän läästen Knipkensleek tou aan Wädloop uum do lääste Woonengen, deer wieren näämelk nit fuul fräi.

Ap dän 21. April 1962 wuude ju Universität Brasíla eepend. In 1967 wuude die Wiedkieker-Touden kloormoaked, in 1977 dät Postamt, in 1978 die Stääd-Park un in 1981 ju Säntroal-Bank. Ap dän 31. Moai 1970 wuude ätter tweelich Jiere Bautied ju Kathedroale fon Brasília wäid.

Sänt 1987 stoant ju Stäädmidde fon Brasília ap ju UNESCO-Lieste fon dät Waareldkultuuräärfgoud.

In 1992 is sunt jo dan mäd dän Bau fon ju Metrô Brasília ounfangd un ap dän 31. Meerte 2001 kuude die eerste Ousnit deerfon ienwäid wäide.

Brasíla waas Kultuurhaudstääd fon Amerikoa 2008.