Tom Brok

Do tom Brok (uk: tom Broke, tom Brook, tom Broek, ten Brok, ten Broke) wieren n aastfräisk Haudlingsgeslächt uut dät Norderlound. Die eerste, die in ju Geskichtsbouke naamd is, waas Keno Kenesna, die deer 1309 aan fon do tjo consules et advocati terrae Nordensis waas.

Keno I. tom Brok

Keno I. tom Brok, eer Keno Hilmerisna (* uum 1310; † 1376), waas n Bäidensbäiden fon Keno Kenesna un die eerste, die sik tom Brok naamde.

Hie waas Haudling fon dät Brookmerlound fon 1371–1376.

Ocko I. tom Brok

Kenos Suun Ocko I. (uum 1345–1391) noom dät Emsigerlound noudelk Oamde, dät Harlingerloud un dät Aurkerlound in sien Besit. Hie moakede dät Auerkerlound mäd ju Buurich tou dät Säntrum fon siene Heerskup. Dät waas foar do Aastfräisen ne Ferlätsenge fon ju Fräiske Fräiegaid un hie wuud 1391 bie siene Buurich fon Aurk fermoärend.

Hie waas Haudling fon dät Brookmerlound fon 1376–1391

Aastfräislound uum 1300

Witzel tom Brok

Widzeld, uk Widzel af Witzel tom Brok (uum 1359; † 25. April 1399) waas die Suun fon Ocko I. Do Suldoaten fon dän Ärtsbiskup fon Bremen, fon dän Groaf fon Ooldenbuurich un uur hieden ap n 25. April 1399 him un sien Suldoaten bie Tjootern apluurd. Witzel un sien Suldoaten soachten Skuts in ju Säärke fon Tjootern. Man ju Säärke wuud ounstikt un Witzel un siene Suldoaten stikkeden un ferbaadenden. Uur Uurlääwerengen bejuchte oawers deerfon, dät Widzel bie ju Säärke fon Tjootern fon do Seelter doodhäuwen wuud.

Hie waas Haudling fon dät Brookmerlound fon 1389–1399

Keno II. tom Brok

Keno II. tom Brok (* uum 1380; † 16. August 1417) waas Bruur fon Witzel tom Brok un sin Ätterfoulger. Hie besiegede 1413 dän Oamder Haudling Hisko Abdena un und wiedede sien Heerskup bit tou dät wäästelke Fräislound un Grins uut.

Hie waas Haudling fon dät Brookmerlound fon 1399–1417

Ocko II. tom Brok (links) wuud ätter ju Slacht bie Marienhafe gefangen nuumen, gjuchts Focko Ukena. Bielde: Moaleräi fon 1803

Ocko II. tom Brok

Ocko II. tom Brok (* 1407; † 26. April 1435) waas die Suun fon Keno II. Hie äärwede so groote Heerskupsgebiede, dät hie sik Haudling fon Aastfräisloound naame kuud. Ap n 27. Septämber 1426 wuud hie fon Focko Ukena bie ju Slacht fon Tjootern sloain. Dät waas n wichtigen Ärfoulch juun do tom Broks un n Jier leeter ap n 28. Oktoober 1427 wuud Ocko II. tom Brok bie ju Slacht ap do Wüülde Äkkere bie Marienhafe noch moal wier fon Focko Ukena sloain un gefangen nuummen. In 1435 is Ocko II. tom Brok as lääsde fon ju Haudlingsfamilie dan stuurwen. Deermäd was ju Familie tom Brok uutstuurwen.

Hie waas Haudling fon dät Brookmerlound fon 1417–1427

Ju Tied ätter do tom Broks

Deer Ukena dän Ocko tom Brok foulgede as Heersker, annerde sik nit fuul in Aastfräislound. Twiske ju Heerskup fon tom Brok un Ukena häd dät neen Unnerskeed roat. Deertruch wuude dän Juunsät fon dät Foulk juun Ukena gratter. Do lälke sik deerjuun sättende Aastfräisen kreegen dät Geslächt Cirksena as Uppermon. Ätterdät ferskeedene Slachte foar Ukena ferlädden wieren geen hie ätter Munster. Bit sien Dood lieuwede Ukena bie sien twäide Wieuwmonske Hiddeke van Garreweer in Diekhusen in do Groninger Uumelounde.

Wällen, Anmäärkengen un Ätterwiesengen

Wällen, Anmäärkengen un Ätterwiesengen:

Dettmar Coldewey: Heimatkundliche Daten. Wegweiser und Zeittafel zur Historischen Bildkarte des Jade-Gebietes. Lohse-Eissing, Wilhelmshaven 1960.
Otto Galama Houtrouw: Ostfriesland. Eine geschichtlich-ortskundige Wanderung gegen Ende der Fürstenzeit. 2 Bände. Dunkmann, Aurich 1889–1991, (Nachdruck: Schuster, Leer 1974, ISBN 3-7963-0088-X).
Tileman Dothias Wiarda: Ostfriesische Geschichte. 10 Bände (in 11 Teilen). August Friedrich Winter, Aurich 1791–1819, (Nachdruck: Schuster, Leer 1968), (Band 10: Neueste Ostfriesische Geschichte).
Ernst Friedländer: Ostfriesisches Urkundenbuch I. Emden 1878, Urkunde Nr. 44, online unter URL: http://www.cartago.nl/content/view/61/87
Heinrich Schmidt: Politische Geschichte Ostfrieslands. Rautenberg, Leer 1975 (Ostfriesland im Schutze des Deiches, Bd. 5), S. 72