Río Guaviare

Die Guaviare (aleer uk Guayare) is een Äi in Kolumbien. Hie häd een Loangte fon 1.760 km, wan me uur ju langere fon sien bee groote Wäl-Äien mät. Hie fljut mäd dän bupperen Orinoco (bit hier uk Río Parágua naamd) touhoope. Uumdät hie langer is un moor Woater fiert as die buppere Orinoco, jält die Guaviare hydrologisk as die Haudstroom fon dät Orinoco-System.

Koarte mäd dät Orinoco-System, die Guaviare ienteekend.

Ferloop un Natuurruumte

Do bee Wäl-Äien fon dän Guaviare sunt die Ariari un die wät grattere Guayabero, do in do Anden hiere Wällen hääbe. Die Guayabero häd een Loangte fon 540 Kilomeetere. Fon deer oun, wier do bee touhoopefljoote, hät ju Äi Guaviare. Unner düssen Noome fljut ju 1220 Kilomeetere bit tou ju Steede, wier ju mäd dän bupperen Orinoco of Río Parágua touhoopefljut. 630 km fon dän Guaviare sunt skipbeer. Unner ju Mundenge fon dän Ariari lait ju Woaterfierenge bie 1930 m³ / s; wier hie mäd dän bupperen Orinoco touhoopefljut, sunt dät 7400 of 8200 m³ / s

Mäd sien ljoachtbruun Woater is die Guaviare een typiske Wietwoater-Äi mäd groote Sedimentfracht uut do Anden un do subandine Kätten. Hie fljut in sin Bupperloop mäd masse litje Takken in een breed Bääd fon Steengruus; in sin Unnerloop fljut hie in groote Slingen. Sowät in ju Midde fon sin Loop snit ju Äi Granit-Höäwele, sodät dät fjauer Sluchten rakt, wier dät Woater deels uur Stappen deelbruuset. Ju grootste Äi, ju deer uunerwaiens oanefljut is die Río Inírida, uk die Río Atabapo is wichtich.

Die Guaviare foarmt in sin Bupperloop dät Skeed twiske do Llanos un dän Tropisken Rienwoold fon ju Amazonas-Niede. Dät rakt deer masse ferskeedene Fiske in dän Río Guaviare.

Kultuur un Wirtskup

Loangs do Ougere fon dän Río Guaviare siedelje moorere Indioaner-Foulke, biespilswiese do Guayabero, Tinigua, Sikuani, Nukak, Piapoco un Puinave. Düsse Ljuude hääbe al fon't 16. Jierhunnert oun mäd Europäere tou dwoon häiwed, truch Missionoare, Conquistadoren un Gouldsäikere. Fon dät leete 19. Jierhunnert oun koom dät Rebät uk unner dän Ienfloud fon ju groiende Kautschuk-Industrie

In dän Beriek fon dän Bupperloop wäd die Galeriewoold moor un moor truch Kultuurlound ärsät, wier foaraaln Kakao ounbaud wäd, man uk masse uur Kultuurplonten fon do Tropen. Sänt sowät 1980 is uk die illegoale Ounbau fon Koka betjuudend. In do lääste Jiere häd uk ju Befoulkenge tounuumen, un uk die Uutbau fon Ferkiersweege, besunners uum San José del Guaviare tou. Düt is ju grootste Stääd oun ju Äi, mäd aan Lufthoawen un ju eensige Brääch uur ju Äi. Twiste twiske ju Guerilla-Organisatsjoon FARC un stoatelke of paramilitäriske Eenhaide sunt läip foar ju Äntwikkelenge fon ju Region.

Wällen

Düssen Artikkel stöänt sik grootstendeels ap ju düütsksproakige Wikipedia.