Kap Verde

República de Cabo Verde(Portugiesisk) Republik Kap Verde Woalspruch: {{{Woalspruch}}} Nationoalhymne: Cântico da Liberdade Amtssproake Portugiesisk Haudstääd Praia Stoatsfoarm parlamentariske Demokratie Ienwoonere 426.998 (2008) Munte Kapverdisken Escudo Tiedzone UTC -1 Fierdai Loundkode {{{Loundkode}}} Auto-Känteeken CV Internet TLD .cv Telefonfoarwoal +238

Kap Verde of do Kapverdiske Ailounde (portugiesisk: Cabo Verde) is n Lound (Ailoundegruppe) foar ju Wäästkuste fon Afrikoa. Die Archipel hiet toufoarne Ilhas de Cabo Verde un is so naamd weegen ju Loage fon do Ailounde juunuur dän Kap Verde (gräinen Kap), die wäästelke Punkt fon dät afrikoanske Fäästlound in Senegal. As dät Lound uunouhongich wuud, is die Noome annerd tou Cabo Verde.

Geskichte

Kap Verde waas uunbewoond as 1460 do Portugiesen ap do Ailounde koomen, do dan ätters Deel uutmoakeden fon dät portugiesiske Riek. Jo siedelden sik 1462 an ap Santiago un 1587 wuud ju Ailoundegruppe ne portugiesiske Kolonie. Do Ailounde bildeden deerbie ne wichtige Steede foar dän Sklaawenhonnel. Ju Befoulkenge fon Kap Verde is deertruch äntsteen uut ne Moangelse fon portugiesiske Koloniste un afrikoanske Sklaawen.

Skiepe unnerwains fon Europa ätter aal Wiendstriche, do hier anlaiden, noomen Woater, Geflöägel un Fruchte ien. In Tuusk roaten do Seefoardere do Kapverdier maastens rookartikkele, as Piepen, Toobak, man uk Kloodenge. Dit wiest sik uut do Raisefertälstere fon dän mechelsken Raiser Jean Francois Michel. Sien Chronike sunt ne gans wichtige Wälle foar ju Geskichte fon dit Lound. Hie waas 1752 ap Truchfoart ätter China un ferbleeuw alwen Deege in Kap Verde. Uk die britiske Piroat Woodes Rogers begjuchte Ounfang 18.Jh. uutfüürelk uur dän Toustand fon dät Lound.

Dän 5. Juli 1975 wuud Kap Verde ap Eende uunouhongich fon Portugal; die Sozialist Aristides Pereira wuud die eerste Präsident. Hie wuud noch twäie wierwoald, eer dät Lound 1990 n Moorpaatäie-System kreech. Pereira wuud ätterfoulged fon dän Demokroat Antonio Monteiro Mascarenhas, die foar sik 2001 ätterfoulged wuud fon Pedro Pires.

Geografie

Noudelke Ailoundegruppe

• Barlavento:
  • Santo Antão
  • São Vicente
  • Santa Luzia
  • São Nicolau
  • Sal
  • Boa Vista

Suudelke Ailoundegruppe

• Sotavento
  • Maio
  • Santiago
  • Fogo
  • Brava

• Haudstääd: Praia
• Kustenlienje: 965 km
• Hoogsten Punkt: Mount Fogo, 2829 m.
• Läichsten Punkt: 0 m.
• Buuräi: foarallen Sukkerrait (Santo Antão) foar ju Produktion fon Grog (groqe de Santo Antão) (n Oard Rum). Uk Kassave, Yam (n Poard Wuttel), Bananen, Papaja, Mango, Ervilia (n Oard Boonen).

Ferwaltengsgliederenge

Kap Verde is iendeeld in 2 Distrikte un 22 concelhos (Meenten).

Politik

• Stoatsuurhaud: Präsident Pedro Pires, siet n 22. Meerte 2001
• Regierengsfierder: Ministerpräsident José Maria Pereira Neves, siet n 1. Februoar 2001
• Parlament: Nationoale Assemblee, wääld foar fieuw Jiere.

Kultuur

Musik

Kap Verde häd ferskeedene Musikstile. Do maast bekoande sunt die 'Funaná' un die 'Morna'. Die Funaná is swingene Donsmusik, wüült die Morna n Stuk Loangsoamer un melancholisker is.

Sproake

Portugiesisk is ju eepentelke Sproake ap Kap Verde, man do Ljuude baale foarallen Crioulo, ne Misksproake fon Portugiesisk un afrikoanske Sproaken.

Köäkene

Ju Nationoalspiese is Cachupa, ne Spiese fon Turske Weete mäd ferskeedene Soarten fon Boonen.