Bierich-Tapir
| Bierich-Tapir | ||||||||||||||||
|---|---|---|---|---|---|---|---|---|---|---|---|---|---|---|---|---|
 N Bierich-Tapir (Tapirus pinchaque) | ||||||||||||||||
| Systematik | ||||||||||||||||
|
Die Bierich-Tapir (Tapirus pinchaque), uk as Anden-Tapir of Wul-Tapir beteekend, is een Suugediert uut ju monogeneriske Familie fon do Tapire (Tapiridae). Die Bierich-Tapir is ju twäidlitste Oard fon Tapire. Sien Lieuwendsruumte lait in do hooge Anden fon Ecuador, Kolumbien un dät noudelke Peru, wier hie ap 2000 bit 4500 Meetere uur ju See foarkumt. Wuddelk säilden is uk moal aan ap läigere Hachte tou sjoon. Uumdät do Moanskene ju Lieuwendsruumte fon do Bierich-Tapire fernäile, is ju Oard in Gefoar.
Lieuwendswiese Beoarbaidje
Do Dierte sunt maasttieds snoagens unnerwaiens, man toumäts uk deeges. Buute fon ju Brumst-Tied lieuwje do uutwoaksene Dierte aleenich. Jo konnen goud loope, klieuwerje, swimme un duukje. Jädden walterje sik do Dierte in'e Mudde.
Bierich-Tapire freete jädden Bleede, Twiege, Fruchte un uur Plontendeele. Ju Wietenskup koant moor as 200 Plonten, do fon do Bierich-Tapire freeten wäide. In ju Druuge Tied freete jo uk Gäärs. Een wichtige Plonte foar dän Bierich-Tapir sunt do Mammut-Bleede (Gunnera). Deerfon freete do Dierte do groote Bleede un do Steele, man jo ferstopje sik uk jädden deer unner. Uumdät jo uk Fruchte un Bäien freete, dreege jo uk hieren Deel tou ju Uutspreedenge fon wäkke Plonten bie, wan jo do ätters wier uutskiete. Do Dierte mouten Soalt un Mineroalien slikje, uurs sunt do nit goud ap Steede. Jo bruuke do Mineroalien uk, uum wäkke Plontengifte ferdreege tou konnen.
Do Dierte konnen sik poorje, wan jo two Jiere oold sunt. Sowät insen in't Mound sunt do wieuwelke Dierte brumsich. Dan kuume do Montjene bietou, uum sik mäd dät Wiefken tou poorjen. Jo dreege sowät trättien Mounde (in n Truchsleek 393 Deege). Maasttieds kumt dan een oankeld Koolich tou Waareld. Dät Litje is dan sowät 28 bit 30 cm hooch un wächt twiske 4 un 6 kg. Juust so as aal do Tapir-Koolwere hääbe uk litje Bierich-Tapire een Teekenge ap't Fäl: Een ljoachtbruune Gruundfaawe, wier woagelääsende Striepele un Plakken ap sunt. Ju Teekenge tjoont deer tou, dät dät Koolich foar Roowdierte nit goud tou sjoon is. Ätter tjo Mounde begint ju Muur loangsoam, dät Litje outousätten. Man bit dät heel un aal neen Molk moor kricht, duurt dät wät langer, sun Jier. Aan eenjierigen Bierich-Tapir wächt al sowät 100 kg. Aaltouhoope blift dät Jungdiert bie sien Muur, bit dät sowät 18 Mounde oold is. Ätters kon ju Muur wier näi befruchted wäide.
Do Dierte wäide fon Pumas un Anden-Boaren joaged. Toumäts wäd uk moal n Bierich-Tapir fon'n Jaguar hoald, man dät kumt säilden foar, uumdät Jaguare nit jädden so hooch in do Bierge unnerwaiens sunt. Junge Bierich-Tapire faale bie Tuuren uk dän Anden-Kondor tou'n Offer.
Dät hoochste Oaler, dät n Bierich-Tapir roaked häd, lait bie bolde 28 Jiere.