Wäil

Uum fon Floaks un Wulle Jäiden tou moakjen, bruukt me dät Wäil.

Die Hauddeel fon n Wäil is die Boank. Deerap sit ju Muur un foaroun is ju Skruuwe, wiermäd me ju Muur ap un deel skruuwje kon. Twiske ju Skruuwe un ju Muur, deer sit die Apstok, die in n gjuchten Winkel uumhooch gungt. Un ap dän Apstok sit ju Huutsene, wier dät Floaks uumetou rulled wäd. Dät Floaks ap e Huutsene heete se ju Diesene, wier die Träid, die der moaked wäide skäl, uut leeken wäd.

Ap de Muur sit dät Twäärsholt of Kjuusholt un deerap stounde do Bee Stonnerkene of Jüfferkestokke. Twiske do bee Stonnerkene is ju Flucht un deerap sitte ap bee Siede tjoon Hoaken fon Wierträid. Truch ju Flucht gungt ne iersene Spilne, ap eene Eend mäd ne holtene Weerwe un ap uur Eend mäd n Gat deeroun, wier die Träid truch gungt. In e Midde is ne holtene Piepe, deer gungt dät Jäiden ap.

Ap die uur Eend fon de Boank sunt twäin Oaksestokke of Ierme, deeroun lapt dät Rääd mäd njuugen of tjoon Speeken. Ju Oakse wäd fon twäin Stikken fäästheelden, dät ju der nit uut loope kon. Uum dät Rääd is ne Glusse un sukke Glussen sunt uk ap ju Rulle fon ju Piepe un ap ju Weerwe. Uum dät Rääd un ju Weerwe un ju Piepe deer gungt n Snuur uumetou, die eene Strange uum ju Weerwe un die uur uum ju Piepe. Dät Snuur kon me strom luuke mäd ju Skruuwe.

Twiske do tjo Beene, deer dät Wäil ap stoant, is n Treede mäd n Treedestok ätter t Rääd. Wäd nu unner treeden, dan lapt dät Rääd rund un uk ju Piepe un ju Weerwe. Un mäd dät Rundloopen dan gungt dät Jäiden aal ap ju Piepe, deeruum dät ju juust ieuwen gauer troalt as ju Weerwe un ju Flucht. Wan ju Piepe nu ful is, dan nimt me ju der uut un sät ne friske deeroun. Leeter dan kumt dät Jäiden ap n Haspel.

Woudelieste

Apstok m., Been n., Boank m., Diesene f., Flucht f., Flucht f., Gat n., Glusse f., Hoaken pl., Huutsene f., Ierme pl., Jüfferkestokke pl., Kjuusholt n., Muur f., Noose f., Oakse f., Oaksestokke pl., Piepe f., Rääd n., Skruuwe., Snuur n., Speeke f., Spilne f., Stikke f., Stonnerkene pl., Strangen pl., Träid m., Treed m., Treede f., Treedestok m., Twäärsholt n., Twäärsstok m., Uutsene f., Wäilrääd n., Weerwe f., Wierträid.