Poppe Folkerts
Poppe Folkerts (* 9. April 1875 ap Norderney; † 31. Detsämber 1949 ap Norderney) waas n aastfräisk Moaler un Teekener. Hie is foarallen uum sien aastfräiske Skilleroatsjene bekoand wuuden.
Lieuwend Beoarbaidje
Poppe is n Suun fon Folkert Janssen Folkerts un Johanna Reemtdina Meyer. Do sien Oolden stuurwen, moakede hie in'n Oaler fon 14 Jiere ne tjojierige Leere in Moaler- un Gloaskerhoundwierk. Deerätter geen hie as Gesälle appe Raise un saach toueerst Köln un Frankfurt un deerätter Hambuurich un Berlin, wier hie sien Hatenstocht foar ju Kunst äntwikkelje kuude.
1896 stoalde Folkerts sik bie Carl Saltymann fon ju Berliner Kunstakademie foar un wuude ap sien Anräiden in't Privoatatelier fon Hermann Eschke in Berlin apnuumen. Hie kreech n Stipendium an ju Berliner Akademie un waas bit tou 1900 Sköiler bie Carl Saltzmann, 1902 bit 1903 bie Friedrich Kallmorgen un toulääst 1903 Meestersköiler bie Ludwig Dettmann in Königsberg. Dät Anräiden fon sin Leermeester un foarallen fon Anton von Werners, die Direktor fon ju Köönichelke Hoochskoule fon Bildjende Kunst mäd persoonelk Ferlof fon Kaiser Wilhelm II, moakede him in do Jiere 1900 bit 1903 Studienfoarten an Boud fon kaiserlke Marineskippe muugelk. Ap disse Raisen saach Folkerts ju Noud- un Aastsee, ju europäiske Atlantikkuste un dät Middelmeer bit Istanbul un Jerusalem tou. In disse Tied roate hie dän Kaisersuun Prinz Adalbert fon Pruusen Teekenunnergjucht. Twisketruch lieuwede Folkerts n poor Mounde in Italien ap Capri.
1906 look hie ätter Kiel wai un wuude deer Meeglid fon'n Kiel Kuunstfereen un ju Släswiek-Holstenske Kuunstgenossenskup un staalde noch dätsälge Jier in'n Rome fon ju Kuunstlerkoppel „Schleswig-Holstein“ meenskuppelk mäd uur Kunstmoaler so as Emil Nolde, Hans Arp un Hans Peter Feddersen in ju Kieler Kuunsthalle uut.
1907 un 1908 studierde hie in Düsseldorf bie Eduard von Gebhardt Figuuren- un Poträtmoaleräi un geen 1909 ätter Paris wai, wier hie an ju Académie Julian apnuumen wuude. Deer studierde hie do groote Impressionisten Édouard Manet, Claude Monet, Jean-Baptiste Camille Corot un Jean-François Millet.
1910 geen Poppe Folkerts ätter Aastfräislound wieruum un woonde ap Norderney. Deer baude hie 1911 sien Touden-Atelier an ju Suudwäästekaante fon't Ailound, dät leeter bekoand wuude as dän Moalertouden. Mäd sien Sailboot Senta fuur hie bie ju Kuuste loangs un uur dän Wäädsee, besoacht do uur Ailound uum sien Iendrukke in Natuurstudien fäästtouhoolden.
.jpg)
In'n Eersten Waareldkriech waas hie Kriechsmoaler an ju Wäästfront in Frankriek un Flandern un sien Iendrukke wuuden fon ju Leipziger Illustrierte Zeitung bruukt.
1917 hilkede Poppe Folkerts ap't Ailound Juist ju Kapitänsdochter Frida Wilken (1893–1982) uut't aastfräiske Kunstlertäärp Westeraccumersiel (Dornumersiel). Jo kreegen fjauer Bäidene: 1919 Hanna († 2005); ju waas mäd dän Tuunarchitekt Friedrich Schaub hilked, ju Moalerske Frauke Moroni-Folkerts (3. Meert 1921 – 14. Meert 2006) un Almut (23. April 1927 – 17. Meert 2022). 1930 wuude as lääste Bäiden die Suun Heiko Folkerts (13. Februoar 1930 – 7. November 2007) in'n Moalertouden bädden; hie waas Architekt, Moaler un Hoochskoulkoaster an ju Techniske Universität München un wädt as n Pionier fon't ökologiske Bauen in Europa säin.
As fräie Moaler oarbaidede Poppe Folkerts ferdoun ap Norderney. Hie hiede Kontakt tou uur aastfräisk Moalerfoulk, uk do Dichtere Arend Dreesen un Berend de Vries wieren sien Fjuunde. In disse Tied waas hie fuul unnerwaiens mäd sien Familie ap sien Sailboot un raisede in do 1920er un 1930er Jiere truch Fräislound, Hollound, Bälgien un Frankriek. Ap disse Raisen hiede hie sien Inspiration foar näie Kunstlerwierke apdäin. Folkerts moakede uk foar dän wichtigen Reformpädagogen Martin Luserke (Skoule an dän See) ju Titelbielde fon ju Novelle "Die Fahrt nach Letztesand", ju in Luserike sien Dichtersboot Krake moaked wuude, wiermäd hie as fräie Skrieuwer truch Noud- und Aastsee sailde.
Ätter dän Eersten Waareldkriech moakede hie säks Motive foar dät Noodjeeld foar sien Ailound Norderney. Een fon do Motive, dät Kaap fon Norderney, woalde ju Stääd Norderney tou hiere Woapen, wiertou hie dan uk noch ju swot-blau-wiete Stäädflaage moakede.
1925 broacht hie ju Gruundenge fon'n Norderneyer Sailfereen ap dän Wai, wierfon hie die eerste Boas wuude.
Tou Begin fon dän Twäiden Waareldkriech wuude sien 'Moalertouden' truch ju Weermacht in Besleek nuumen un leeter uut Kriechsgruunde deelrieten. Deertruch waas hie un sien Familie twoangen uumtouluuken. Eerst 1949 kuude hie wier in dät läip fernäilde Bauwierk, wierfon bloot dät unnerste Deel noch stuude.
1943 wuude Poppe Folkerts as Meeglid in't aastfräiske Kultuurparlament, ju Aastfräiske Loundskup, beroupen.
Folkerts stoorf an Silvester 1949 in sien Huus ap Norderney. Ap'n 4. Januoar 1950 waas sien Seebesteedigenge, wierbie n groot Deel fon ju Nordereyer Befoulkenge waas. In dät Familiengrääf ap'n Ailoundsäärkhoaf Norderney kreech Folkerts n Toanksteen. Tou sin 60. Stíerwedai staalde dät Aastfräiske Loundesmuseum in Oamde in n Reetrospektive eenige Wierke fon Folkerts uut.
Sjuch uk Beoarbaidje
Commons: Poppe Folkerts – Sammelenge fon Bielden, Filme un Heerdoatäie