Kroane

Ne Kroane (de. Wasserhahn) is n Mechanismus, wiermäd ju Ströömenge fon ne Flüssichhaid of n Gas in ne Laitenge räägeld wäide kon. Wieduut do maaste Kroanen konnen ju Truchströömenge striekend räägelje twiske gans sleeten (neen Ströömenge) un fulboodich eepen (maximoale Ströömenge). Dät Räägeljen geböärt mäd ne traalende Bewäägenge, ju der uurbroacht wäd fon n Traalknoop of ne Heeuwelte ap dät Ouspeerventil. Ouhongich fon dän Typ Kroane kon dän Räägelberäk bestrieken wäide mäd aan fjoondel bit moorere Uumetraale. Kroanen do dät uut ne Laitenge loope läite, hääbe ne Tüüte, sodät n fluggen Stroal äntstoant. Wäkke Kroanen hääbe n Uutloop mäd n Skruufanslus, sodät ne tiedwiese Ferbiendenge mäd n Ferbruuker moaked wäide kon, toun Biespil truch ne Tuunhoose of een Gasslauch. Kroane do der in ju Laitenge apnuumen wäide, konnen mäd Skruuf-, Flansk- of Löödferbiendengen uutfierd weese.

Dät Ouspeerventil kon ätter ferskeedene Prinzipe oarbaidje, as n Gummiring die der ap ne Boorenge drukt wäd, n Kuugel mäd n Twäärsgat, die der fertroald wäd, n Keegel die der in ne Piepe skäuwen wäd, twäin skuuwende keramiske Ringe of n Rubberslauch die der tichtkniepen wäd.

Dät maast bekoand sunt wäil ju Woaterkroane, ju Gaskroane un ju Ounbäitkroane tou Gebruuk in ju Huushollenge foar Toufier fon bäätnunner Woater, Gas un Waarmte.

Soarten Kroanen Beoarbaidje

Ju Hond-Miskkroane (Miskbatterie), ju der bestoand uut ne Kroane foar heet un een foar koold Woater, do der in ju Kroane misked wäide.
Ju Thermostoatkroane (Thermostoatventil), dät is ne Miskkroane in ju n Thermostoat dät Ferhältnis twiske woorm un koold Woater räägelt, sodät ne konstante Temperatuur biebeheelden blift.
Ju Ounbäitkroane of dät Bäitventil, wiermäd dät heete Woater ätter dän Radiator räägeld wäd.
Ju thermostoatiske Ounbäitkroane, ju dät heete Woater ätter dän Radiator räägelt mäd Hälpe fon n Thermostoat.
Ju Oulätkroane ap n Radiator uum ju tou äntluftjen.
Ju Gaskroane, ju der eerste ientaid wäide mout uum ju eepentoutraalen, uum uunapsichtelk Eepenjen fon dän Gastoufuur toufoar tou kuumen.
Ju Kuugelkroane, wierbie ju Ousluutenge geböärt truch n Kuugel mäd n Gat deeroane, die der in ju Truchstroom-Eepenge fertroald wäd.
Ju Buutenkroane, ju der bie Froast nit stukken fjoose kon, deeruum dät dät Ouspeerventil an ju Binnersiede fon de Muure montierd is.
Ju Ouspeerkroane uum toun Biespil Oarbaiden an Laitengen foartouniemen sunner dät ganse Laitengsystem loosloope tou läiten.
Dät Swik is ne holtene Tapkroane, so as do der in Bjoorfeete ounsloain wäide.