Jameson Raid
Suudafrikoanske Republik, oafter uk Transvaal-Republik naamd, in orange
Koarte mäd ju Suudafrikoanske Republik, oafter uk Transvaal-Republik naamd, in orange.
Doatum 29. Dezember 1895 bit 2. Januoar 1896
Steede Suudafrikoanske Republik
Uutgong Do Buuren winne
Konfliktpaatäie
irreguläre probritiske Eenhaide
Uppermonljuude
Leander Starr Jameson Piet Cronjé

Die Jameson Raid (uursät: „Jameson-Uurfall“) waas n Uurfaal ap ju Suudafrikoanske Republik (in ju Loundskup Transvaal), die fon dän 29. Dezember 1895 bit tou dän 2. Januoar 1896 tou duurde un fon Leander Starr Jameson fierd wuude.

Bäätergruunde un Ouloop Beoarbaidje

Die Ploan waas, fon ju Kapkolonie uut n Apstound fon buutloundske, maast britiske Oarbaidere (Uitlanders) in Transvaal Stöän tou reeken un dät Rebät oun't britiske Territorium oun tou sluuten. Dät wüülen do Briten, uumdät do "Uitlanders" dubbeld so fuul wieren as do Buuren, un jo somäd n Ounspröäk ap dät Lound siegen. Buppedät wuuden do britiske Oarbaidere fon do Buuren läip deeltaaid un hieden neen fulle Burgergjuchte.

Die Uurfaal waas fon dän Premierminister fon ju Kapkolonie Cecil Rhodes ploand, die een säkshunnert Mon stäärke Troppe dän Uppermon Jameson unnerstoalede. Truch n misferstoundelk Telegram, dät hie fon do "Uitlanders" kreech, saach sik Jameson, dän Ferwaltengsboas fon Suud-Rhodesien, tou ne gauere Honnelenge twoangen.

Dät Telegram lutte as foulget:

"It is under these circumstances that we feel constrained to call upon you to come to our aid should a disturbance arise here the circumstances are so extreme that we cannot but believe that you and the men under you will not fail to come to the rescue of people who are so situated."

Nu rakt dät deer ferskeedene Uursättengen tou, aal deerätter, wier me n Punkt sät. Sät me dän Punkt eerste ätter "should a disturbance arise here", dan is dät so tou ferstounden, dät hie unner ju Bedingenge hälpe skäl, dät aan Apstound uutbräkt. So waas dät wäil toacht. Man wan die Punkt al ätter "to come to our aid" sät wäd, un so kreech dät Jameson wäil inne Hounde, is dät ne direkte Aaskenge, dät hie do "Uitlanders" tou Hälpe kuume skäl.

Jameson begon ju Aktsjoon täämelk koploos, wiermäd ju foar do Briten unner neen goude Foarteekene stuude. Hie informierde Rhodes mäd n Telegram, dät hie nu mäd sien Troppe oumarskierde un Rhodes, die dän Uurfaal sälwen uuttoacht hiede, man nit mäd dän Tiedpunkt ienfersteen waas, befuul sien Ljuude insteede fon Hälpe tou seenden, sik fon dän Uurfaal amtelk tou distansierjen. Hie toachte, dät dät nit goud gunge kuude un dät so bloot do Minen-Lizenzen ap't Spil stounde.

Ätter n poor Deege un Skjooteräie mäd buuriske Eenhaide moaste sik Jameson reeke. Hie wuude an do Briten uutlääwerd, do him tou füüftien Mounde Pieson feruurdeelden, wierfon hie oaber bloot fieuw ouseet.

Uk wan sik Fertreedere fon Grootbritannien fon dän Jameson Raid distanzierden, moakede die Jameson Raid dät in't Foaren al läipe Ferhooldnis twiske do bee Lounde noch läpper un waas somäd n wichtigen Stap in dän Twäiden Buurenkriech.