Immerath (Erkelenz)

Immerath waas een Täärp in dät Rhienlound, dät toulääst (sänt 1972) as Stääddeel fon Erkelenz ferwalted wuude. Intwiske is dät Täärp foar ju Bruunkoole-Winnenge oubaagerd wuuden, dät diede die Konzern RWE.

Dezember 2017: Deele fon dät Täärp stuuden noch

Januoar 2018: Do Räste fon dät Täärp, wilst ju Säärke ourieten wuude.

Geskichte

Fon Immerath wuude in 1144 foar't eerste Moal in ne Uurkunde skrieuwen, deerätter bestuude dät Täärp moor as oachte Jierhunnerde, bit dät twiske 2006 un 2022 uumesiedeld un ourieten wuude.

In't Hoochmiddeloaler naamde sik een Rieder-Sibskup ätter dät Täärp, ju Buurich fon düsse Riedere waas noudelk fon ju Säärke. Ju Sibskup stoorf uum 1400 uut, in ju Foulge ferfäl uk ju Buurich.

Ju Moorhaid fon ju Befoulkenge waas roomsk-kathoolsk, evangeelske un tiedwiese uk Juuden wieren een Minnerhaid. Al in't Middeloaler heerden wäkke Buurenhoawe in Immerath tou diverse gäistelke Institutionen (t.B. Klaastere). Een Säärke wuude al in't 12. Jierhunnerd baud un leeter uutbaud, so äntstuuden toun Biespil in't 14. Jierhunnerd two Sieden-Skiepe. Ju wuude in 1888 ourieten, uumdät me foar ju grattere Befoulkenge uk een grattere Säärke hääbe wüül. Uum 1890 wuude ju groote Parochioal-Säärke St. Lambertus baud, ju in dät Foulk as "Immerather Dom" bekoand wuude. In 1891 wuude ju wäid.

In 1901 gruudeden do Dochtere fon't Hillige Kjuus een Deelläitenge in Immerath, bauden in 1902 un 1903 Klaaster, Kapälle un Kroankentrakt. In 1904 wieren deer al 95 Kroanke unnerbroacht, do fon säkstien Sustere betjoud wuuden. In 1921 wuude deer een Iengjuchtenge foar nit moor skoulplichtige Fersuurgengsfaale uut moaked, ju kreech in 1926 dän Noome "Haus Nazareth". As in ju Tied fon ju nasjonoalsosjoalistiske Diktoatuur (uk juun Wierstound uut ju kathoolske Säärke) ju Aktion T4 die Massenmoort oun Behinnerde truchfierd wuude, wuuden uk 125 Patientinnen uut dät Huus Nazareth fon do Nazis uumebroacht. Eepentelk wuude fertäld, do wieren bloot ferlaid wuuden, uumdät me foar dän Kriech Kroankenhuuse bruukte. Juun Kriechs-Eende wuude uut ju Iengjuchtenge wuddelk een Lazareth moaked, man ju Aktion T4 wuuden räägelmäitich Patienten moorfäk fon een Iengjuchtenge in een uur ferlaid, sodät do Familien un dät Pleegepersonoal niks meekriege skuulen. Fonsäärm fäl dät daach ap, wät do Nazis deer dieden. Dät Klaaster wuude in 2001 aploosd, dät Kroankenhuus moaste in 2009 uumeluuke un wuude mäd een privoat Kroankenhuus in Erkelenz touhoopelaid. Dät Huus Nazareth wuude in 2015 ourieten.

As die Immerather Doom in dät Jier 2018 ourieten wuude, wieren nit moor fuul Huuse bewoond. Fon ju Fernäilenge fon dät Täärp profitierde die Koole-Konzern RWE, die do Bruunkoole-Faorkuumen fon ju uumreekende Loundskup uutbüütet un deerfoar al masse Täärpe fernäile liet. Wäl Huus un Hoaf nit ferkoopje wüül, moaste deer mäd reekenje, äntoaind tou wäiden. Uk ju Iendreegenge fon trättien skutsede Bau-Toankmoale kuude dät Täärp nit rädje. Foar ju Befoulkenge fon Immerath wuude ju Näibau-Siedelenge Immerath (neu) gruunded; wan sik do Ljuude ap dät histooriske Täärp beluuke, baale jo deeruum oafter fon Alt-Immerath (Oold-Immerath).

Befoulkengs-Äntwikkelenge

Jier	1767	1818	1871	1925	1970	2008	2010	2013	2017	2020	2022
Ienwoonere	399	733	1172	1307	1537	712	401	40	59	24	24

Bielden

• 
  Dät Huus Nazareth in 2008
• 
  Ju Määlne fon Immerath in 2011
• 
  Dät Wäästwierk fon ju äntwäide Säärke St. Lambertus in 2014
• 
  Een Sträite in deelwiese al ourietene Täärp in 2017