Castries

Castries is ju Haudstääd fon dän karibisken Ailoundstoat St. Lucia un häd sowät 3.661 Ienwoonere in't Stääd-Rebät un 16.134 Ienwoonere in do Foarstääde deer uumetou (Stound: 2010 of 2011). Ju Stääd lait in't glieknaamde Quarter ap ju noudwäästelke Kuste fon dät Ailound un is sowät 65 Kilomeetere wäch fon Fort-de-France, ju Haudsteede fon Martinique. Castries is die Sit fon dät Äärtsbistum Castries.

Castries
Statistieke
Ienwoonertaal	± 70.000 (2013)
Fläche	79 km²
Befoulkengstichte	890 / km²
Höchte	2 m
Politik
Lound	St. Lucia
Uur
Stiftenge	1650 as "Carenage" 1756 näien Noome "Castries"
Tiedzone	Aast-Karibiske Tiedsoone (ECT) (UTC-4)
Koordinoaten

Geskichte

Castries wuude äntstuude unner dän Noome Carénage fon 1650 oun truch do Frantsoosen. Toueerste waas deer man een Fäästenge, wieruume dan ju Siedelenge äntstuude. In 1785 wuude dät ätter Charles Eugène Gabriel de La Croix de Castries, marquis de Castries benaamd. In 1794 benaamde Edward Augustus, Duke of Kent and Strathearn ju Stääd ätter sien Muur Kööniginne Charlotte fon Änglound in "Charlottesville" uume. In dän April 1796 wuude ju Stääd mäd Kenunnen beskeeten un truch dät äntsteene Fjuur heel un aal fernäild. Uk in do Jiere 1813, 1927 un 1948 baadende ju Stääd tou groote Deele uut.

Ätterdät in't Jier 1863 dät eerste mäd Koole beleedene Skip in dän Hoawen fon Castries ienfuur, äntwikkelde sik in ju Stääd een Koole-Industrie, man ju briek fon 1906 oun wier ou, wät truch dän Eersten Waareldkriech un ju Eepenenge fon dän Panama-Kanoal in 1914 un ju Waareldwirtskupskrise in 1927 noch gauer geen.

Wirtskup

Die Hoawen fon ju Stääd jält as aan fon do bääste fon do Wäästindiske Ailounde. Deer wäide haudseekelk Banoanen, man uk wäil Sukkerroor, Rum, Sieroop, Kakao, Kokos-Nuuten, Plonten-Oulje un ferskeedene tropiske Fruchte exportierd. Nit fier fon ju Stääd lait die George F. L. Charles Airport.

Kultur

In 1973 wuude dät Folk Research Centre (FRC) gruunded, dät foar ju Dokumentierenge un ju Ärfoarskenge fon ju Aaldais-Kultuur suurget, deerbie uk ju rieke Traditsjoon fon do fon Muule tou Muule uurlääwerde Geskichte fon do "koudmen", do afrokaribiske Kreoolsk baalende (allere) Ailound-Bewoonere. Dät ferföiget uur een äntspreekend Toon-Archiv un uur ju betjuudendste Bibliotäike fon dät Lound. Dät bjudt Sproak-Kurse tou dät lokoale Kreoolske oun un fiert sänt 1984 älk Jier juun Eende Oktober dän Jounen Kwéyòl, dän Dai fon dät Kreoolske, truch, een fon do wichtichste Foulksfääste ap St. Lucia. Sänt 1999 häd dät Folk Research Centre sin Sit ap dän Mout Pleasant buppe ju Ooldstääd fon Castries.

Bekoande Ljuude uut Castries

• William Arthur Lewis (1915–1991), Nobelpriesdreeger foar Wirtskupswietenskuppe (1979)
• Dunstan St. Omer (1927–2015), Moaler
• Derek Walcott (1930–2017), Nobelpriesdreeger foar Literatuur (1992)
• Emile Ford (* 1937), Sjunger fon een britiske Rockabilly-Band fon do äddere 1960er Jiere
• Julian Robert Hunte (* 1940), Diplomoat un Politiker, Präsident fon ju 58. UN-Generoalfersammelenge (2003)

Wällen

• Düssen Artikkel stöänt sik ap ju düütsk-, frantsöösk-, wäästfräisk- un ängelsksproakige Version.