Buutere

Buutere (dt. Butter) wäd moaked fon Room fon Molk. Deertou kumt di Room in ne Säddene, dät is n Oard Fät, wieroun n Stamper mäd Goate (die Pulst) ap un deel bewääged wäd.

Ne Säddene. Weegen ju Metaluutfierenge stamt ju wäil uut leetere Tied, woarschienelk uut dän twäide Waareldkriech.

Oarbaidswiese

[Buutere wuud fröier in Seelterlound fon Wieuwljuude so moaked:] Ju Molk, ju drooget me in n Roompot soloange, dät me sofuul häd, as me säddenje wol. Dan mout me ju Molk soloange stounde läite, dät se suur is un scheeten, dan kon me se säddenje. Is dät Suumerdai, dan kon me se so koold säddenje, is dät Winterdai, dan mout der heet Woater in de Säddene, uurs kon man dät nit touhoope kriege. Häd me dan n Sät säddend, dan foatet dät oun tou schiffen, deerbie kon me sjo, of dät buuterje wol. Wan me dan n Sätje wier säddent, dan kumt der Buutere ap de Molk. Dan mout me noch ieuwkes säddenje, dät ju Buutere in een Stuk kumt, dät hat ‘touhoope’.
Dan kriege do Wieuwljuude n holtenen Näp häär un n holtene Lätse, deer kriege se ju Buutere mäd uut de Säddene in dän Näp. Dan mout ju Buutere truchmoaked wäide un hiered, un dan mout der Soalt oun. Dan wäd se in n ounsjoonelk Stuk moaked un dan is se kloor.
Sies wäd hier in Seelterlound nit moaked, wäil wie hier nit so fuul Molk hääbe". Vk220R (Apnoame uum 1884).

Leeter wuud dät aal uurnuumen fon ju Molkeräi.