Aquarellmoaleräi

Ju Aquarellmoaleräi is dät Moaljen mäd Aquarellfaawen.

L'Aquarelliste (ju Aquarellmoalerske) fon Marie-Claire Lefébure. Een Aquarellbielde wier een Aquarellmoalerske ap oubielded is, wildääge een Säärm-Oubieldenge.

Fergeenhaid

Mäd Woater fermoalde Faawen wuden al in ju Steentied bruukt, t.B. in Höölenmoaleräien. Man dät wieren noch neen Aquarellfaawen in dän Sin fon däälich, do däkkeden fuul moor, un do wuden uk uurse Techniken bruukt, t.B. mäd stuuwende Faawpigmänte un aal sowät.

Aleer wude Aquarellfaawe bloot bruukt, uum Skizzen un Studien tou moakjen. Wäkke Aquarelle fon Albrecht Dürer sunt indäid bikoand wuden un häbe dän Roup fon ju Aquarellmoaleräi een bitje stäärked, man daach häd Albrecht Dürer säärm sien Aquarelle bloot as Skizzen un Studien blouked, un so bleeuw dät uk noch een poor hunnerd Jiere. Läiweloa broachte aan Romantiker uut Änglound, dät waas Joseph Mallord William Turner, ju Aquarellmoaleräi tou ju Bitjuudenge, ju ju däälich in ju Moalerkunst häd.

• 
  Kop fon aan Räi-Buk, moald fon Albrecht Dürer
• 
  Ju Päiterssäärke fon dät Suude, moald fon Joseph Mallord William Turner

Moalwiesen

In ju Aquarellmoalwiese rakt dät two wichtige Moalwiesen, dät is dät Lasierjen un dät Lavierjen. Maasttieds wäide ferskeedene Moalwiesen ferbuunen.

Dät Lasierjen

Een nit kloor moaked Aquarell fon William Berryman, deerap ju Lasuurtechnik goud tou ärkannen is

Dät Lasierjen (af: ju Lasuurtechnik) is, wan me mäd wäite Faawe ap druugen Unnergruund moald. Dät is dan so, dät me in moorere Faaw-Loagen moalt, wiertou een Faawloage aaltied druuged weese mout, eer ju naiste Loage deer ap kumt. Deer mout me uk nit loange täiwe, uumdät ju Aquarellfaawe gau druuch is. Dät duurt fielicht een poor Minuten, aal ätter ju Masse fon Woater, wiermäd me ju Faawe fermoald häd.

Dät Lasierjen häd dän Foardeel, dät me dät goud stjuurje kon. Me kon ap düsse Wiese kloore Kontuuren in ju Bielde brange. Un wan me daach wol, dät two Faawflakten ineenuur uurgunge, kon me mäd ju wäite Faawe dän Skeed-Biriek fon ju druuge-Faaw-Flakte wier wäit moakje un een bitje mädeenuur fermoalje. Deertou mout me een bitje energisker mäd dän Pinsel wierkje.

Dät Lavierjen

"Mephisto und die Hexe" (woarskienelk ätter Goethe sin Faust) een Aquarell fon Magret Hofheinz-Döring, deeroane fuul lavierd is.

Dät Lavierjen is, wan two wäite Faaw-Loagen sik roakje konnen. Dät mäd konnen bisunnere Uurgongs- un Ferloop-Wierkengen äntstounde, man dät is nit so eenfach tou stjuurjen, as bie dät Lasierjen.

Lavierjen kon me mäd ju Wäit-in-Wäit-Technik un mäd ju Ferloop-Technik. Wäit-in-Wäit, dät is, wan du een wäite Faaw-Flakte häst un moalst deer mäd een wäite Faawe roane un ju Ferloop-Technik is, wan an dät Skeed fon een wäite Faaw-Flakte (af een mäd Woater wäitmoakede Flakte) uurs een Faawe ounbroacht wäd. Ju lopt dan in ju Flakte roane, un deertruch äntstoant aan Faaw-Ferloop.

Uurswät

Buute düsse fier ferspratte Moalwiesen rakt dät fonsäärm uk litje Trikke, do nit älken Moaler bikoand sunt.

Toun Biespil rakt dät ju Muugelkhaid, dät me dän Pot mäd ju Fääste Faawe foar kuute Tied in dät Woater smit un dan wier ruut lukt, un dan häd me een tjuk Faaw-Smeer, dät dan heel uurs uutsjucht as normoale Aquarellfaawe. Düt Faawsmeer is, mäd aan druugen Pinsel fermoald, däkkend, so kon mäd do normoale Moalwiesen heel un aal nit moald wäide, normoal skiemert bie Aquareelfaawen aaltied die Unnergruund truch.

Wäl buute moald, die skuul dät fonsäärm bloot bie goud Weeder dwo. Man foar dän Faal, dät dät daach rient, skuul me sik woorm Woater meenieme (goud isolierd, dät dät nit so gau oukeele kon), uumdät sik dät woorme Moalwoater dan nit so goud mäd dät koolde Rienwoater misket. Daach skuul me ju Skilleroatsje so goud as muugelk skuule, uumdät me mäd dän Trik dän Skoade bloot minnerje, man nit heel un aal fermeede kon.