Rhinolophus euryale
| Rhinolophus euryale | ||||||||||||
|---|---|---|---|---|---|---|---|---|---|---|---|---|
 Rhinolophus euryale | ||||||||||||
| Systematik | ||||||||||||
|
Rhinolophus euryale (düütsk:Mittelmeer-Hufeisennase) is een Oard fon Fläddermuus, ju uum dät Middelmeer tou lieuwet, aastelk bit in dän Iran un Turkmenistan; säilden noudelk fon dän 47. Breedengroad; een ousnieden Foarkuumen rakt dät uk in ju Slowakäi. Rhinolophus euryale mai jädden een woorme Wooldloundskup tichte bie do Bierige, besunners, wan dät deer Kalk-Höölen un Woater ap ju Naite rakt. Ju Oard is tou fienden bit ap 1100 Meetere Hööchte, Bäidensstoowen rakt dät bit in 800 Meetere Hööchte. Ju kon bit tou 134 Kilomeetere fier wonnerje, man maasttieds blift ju, wier ju is.
Oainskuppe Beoarbaidje
Rhinolophus euryale häd een Loangte fon 4,3 bit 5,8 Säntimeetere sunner, un twiske 6,5 un 8,8 Säntimeetere mäd Stäit. Hiere breede Juuken häbe een Sponwiedte fon 30 bit 32 Säntimeetere. Uum ju Oard fon Rhinolophus blasii un Rhinolophus mehelyi tou unnerskeeden, mout me ap dän fjoode Finger oachtje, dät fäärme Lid fon dän fjoode Finger häd een Loangte fon 6,6 bit 8,5 Millimeetere, dät twäide Lid een Loangte fon 17,9 bit 19,1 Millimeetere. Fääre sunt tou ju Unnerskeedenge do unnerskeedelke Foarmen fon do Apsättere fon ju komplisierd baude Noose wichtich. As allerweegense in dän Sleek Rhinolophus, is uk bie düsse Oard ju Noose apfaalend foarmd, licht an een Houfiersen ärinnerjend, deerfon uk die Düütske Noome fon dän Sleek (Hufeisennasen) oulat. Do noakende Deele fon't Ounsicht (Noose un Lippen) sunt ljoacht bruunelk, uum do Oogene sunt oafter tjuusterge Hiere. Ooren un Juukenhäid sunt ljoacht gries. Dät Fäl is nit besunners ticht, ju Boasis fon do Hiere is ljoacht gries. Ap ju Bupperkaante häd ju Fläddermuus een griesbruun, licht roodelk töönd Fäl, an ju Unnerkaante is grieselk wiet af jeelsk wiet, deertwiske aan fljootenden Uurgong.
Junge Fläddermuuse fon düsse Oard sunt moor gries.
Wällen un fäärebrangende Literatuur Beoarbaidje
- Wilfried Schober, Eckhard Grimmberger: Die Fledermäuse Europas Kennen Bestimmen Schützen KOSMOS naturführer ISBN 3-440-07597-4
- Ronald M. Nowak: Walker's Mammals of the World Sixth Edition, ISBN 0-8018-5789-9