Idafeen

Idafeen waas bit tou ju Gebietsreform 1974 ne Buurskup fon Strukelje. Däälich heert Idafeen tou ju Meente Aastrauderfeen.

Ju Määlne in Idafeen (Galeriehollounder)

Loage

• Idafeen-Suud lait suudelk ju B438 aastelk Aastrauderfeen un wäästelk Strukelje-Wääst un Wietsound.
• Idafeen-Noud läit noudelk ju B438 aastelk Aastrhauderfeen, Holterfeen un wäästelk Wietsound un Ubbehusen.

Geskichte

In dät Jier 1864 is ju "Moorkolonie am Westkanal" (Idafeentjer Kanoal) loangs ju ganse Wäästsiede fon dät Säspel Strukelje gruunded wuuden. Dät hääbe do Uutändjer Buuren anlaid. 1864 wuud dät Idafeentjer Kanoal (Wäästkanoal) greeuwen; hie waas 3023 Meeter loang un kostede 74239 RM; 1955 wuud dät Idafeentjer Kanoal wier ticht fierd. Där lapt nu ju Sträite Idafeen-Suud. Ju Kolonie kreech 1885 dän Noome Idafehn ätter dän Groothärtsoch sien Määme.

Skoulen

Idafeen hiede fröier two oaine Skoulen in Idafeen-Noud un Idafeen-Suud.

• Ätter dän Bau fon dän Wäästkanoal in 1864 moasten do Bäidene eerste ätter do Skoulen in Holterfoan, Potshusen un Boukeläsk. In dät Huus fon Heike Taute waas dan in 1880 die eerste Unnergjucht foar 40 Sköilere in Idafeen-Noud. 1881 wuud ne Behälpsskoule foar 63 Sköilere baud, ju där 1.800 Mark kostet häd. In 1890 wieren där 90 Sköilere. In 1891 wuud ne näie Skoule baud, ju där 16.300 Mark kostede. Ätter dän Kriech moaste ju Skoule wier näi apbaud wäide foar 60.000 Mark (1949). Ju Skoule in Idafeen-Noud wuud 1973 sleeten un ferkooped.

• In Idafeen-Suud wuud in 1889 ne oaine Skoulacht gruunded un ju Skoule wuude 1899 baud. 1951 wieren deer uur 100 Sköilere. Ju Skoule wuud 1970 sleeten un is ferkooped.

• In 1963 wuud ne näie Gruundskoule foar Idafeen-Suud un Idafeen-Noud tichte bie dät Säntrum fon Idafeen baud ju der intwiske wier sleeten is.

Däälich gunge alle Bäidene fon ju Meente Aastrauderfeen in dät näie Skoulsäntrum in Aasthauderfeen.

Die Idasee

Idasee

In Idafeen-Noud, juust wäästelk fon Seelterlound un noud-wäästelk fon Wietsound lait die Idasee.

Bauwierke

• Ju Friedenssäärke in Idafeen
• Ju Määlne in Idafeen

Bädden in Idafeen

• Hajo Hayen (* 6. Meerte 1923; † 8. November 1991), düütsken Koaster, Prähistoriker un Foanarchäologe

Sjuch uk

• Idasee
• Lound un Noomen, Siede 99

Ferbiendenge

• Möhlenkring Idafehn
• Websiede Meente Aastrauderfeen

Wällen

• Franz Dwertmann: Das grosse Sterben der kleinen Schulen, Vechtaer Druckerei und Verlag, 1984, ISBN 3-88441-025-3

Noabermeenten fon Seelterlound un hiere an Seelterlound gränsede Täärpe un Buurskuppe
Noabermeenten Stääd Ait | Äästerweede (Samtmeente Noudhumling) | Rauderfeen | Aastrauderfeen | Tjootern (Samtmeente Jümme) | Bäärsel An dät Seelterlound gränsede Täärpe un Buurskuppe Kamperfeen | Swonnebiergerfoan | Näiskäddel | Burloage | Loangholt | Idafeen | Stickhusen | Aasterhusen | Roagebierich | Elisabethfeen | Reekenfäld