Holloundsgungere

Do Holloundsgungere (dt. Hollandgänger, nl. Hannekemaaiers, wfr. Hantsjemieren) wieren algemeen Munsterloundere, do der bit sowät 1900 in n Suumer ätter do Niederlounde geenen uum deer as Mäddere wät Jäild tou fertjoonjen. Oarbaider, do ätter Wäästfräislound of Aast-Fräislound geenen, wuuden uk Fräisloundgungere naamd. Deer wieren uk Seelterfräisen, do ätter Wäästfräislound geenen.

Statue fon n Holloundsgunger in Uelsen.

Ju Raise fon do Seelterlounder

Dän Wai hääbe do Holloundsgungere tou Fout moaked, mäd de Saise ap de Näkke, Hondstok un Ransel. Do geenen mäd n Koppel uur Groningen alle Jiere dän sälge Wai ätter Ljouwert in Wäästfräislound. Do koanden dän Wai un so hougeden sik do uur Mäddere do bloot antousluuten. Uk do foonten Oarbaid as Mädder bie do Buuren un fertjoonden goud Jäild. Däälich wunnerje sik do Ljuude, dät do sun loangen Marsk tou Fout moakje kuuden. Domoals waas di Foutmarsk eenfach Moude. Wan die Dai tou Eende waas, sliepen do in bekoande Gaasthuuse un smäidens geen dät wier fääre.

In Ljouwert ap dän Määrkedplats waas die Träfpunkt foar do Mäddere. In Ljouwert waas ne Oarbaidsfermiddeleng iengjucht. Deer hoalden do Buuren se mäd de Woain ou, un älk wiste fluks wier hie wai koom. Do uur Holloundsgungere bleeuwen deels foare (also bie Groningen?) as Eedgreeuwere, do uut dät Hannöverske un Ooldenbuurgske keemen. Man do Seelter geenen al sieläärge ätter Wäästfräislound tou Gäärs mjoon, wan do hiere oaine Eed al greeuwen hieden ap hiere oaine Foane.

Wan do in Ljouwert ankoomen, steegen do Mäddere eerste wier ap dän oolde skeeuwsakkede Uutsichtstouden "Ooldehou", uum de Stääd tou bekiekjen. Bien n Buur bie Achlum wieren dät gjucht goude Ljuude un där doarsten se uk mee in de bääste Stoowe wan de Oarbaid däin waas. Dan moasten se Geskichten un Putsen fertälle ut Seelterlound. Ls349.

Dät Eende fon do Raisen

Dät lääste Jier fon do Raisen mout 1890 weesen hääbe, fielicht 1895, ouhongich deerfon wan do Maimaskinen ap t Määrked koomen. Do Buuren hiede uk wälke bestoald. Man dät geen nit so gau, ju moasten al loange foaruut bestoald wäide. Älk wüül ne Maskine hääbe, deer kuud nit juun moaked wäide. Un wan ju Maskine nit tiedich nouch skuul lääwerd wäide, so moasten do Seelter noch eenmoal wierkuume tou mjoon. Dät roate ne groote Ferannerenge mäd do Gäärsmaskinen. Do Maskinen hieden do Oarbaid uurnuumen. Uk in Seelterlound hieden al eenige Buuren so eene Maskine bestoald. Uum 1930 hieden do maasten Buuren in Seelterlound uk ne Maimaskine.

Wällen

• Hermann Janssen (1964), 'Do lääste Holloundsgungere', in: Pyt Kramer, Dät Ooldenhuus, Westrhauderfehn: Siebe Ostendorp.
• Marijn Molema, Meindert Schroor: Migrationsgeschichte in Nordwestdeutschland und den nördlichen Niederlanden. Quellen, Handreichungen und Beispiele zur grenzübergreifenden Forschung (Benelux-German Borderlands Histories, Band 1). Münster 2019, ISBN 978-3-8405-2001-3

Ferwiesengen

 Wikisource: Do lääste Holloundsgungere – Wällensammelenge