Do Chloroplasten sunt Organellen in do Sällen fon Plonten, gnauer kweeden photosynthetisk aktive Plastiden.

Apbau un Funktion Beoarbaidje

 
1. buutere Membran
2. Intermembranruum
3. binnere Membran (1+2+3: Skeele)
4. Matrix
5. Thylakoidlumen (binne in't Thylakoid)
6. Thylakoidmembran
7. Granum (Granalamelle)
8. Thylakoid (Stromalamelle)
9. Stieuwelsekoarel
10. plastidär Ribosom
11. plastidäre DNA
12. Plastoglobulus (Kuugelfoarmige Struktuur uut Lipide; pl.: Plastoglobuli)

Skeele Beoarbaidje

Aan Chloroplast häd two Skeele-Membranen, wierfon ju buutere täämelk permeabel (truchläitend) is, ju binnere häd oaber n fuul gratteren Diffusionsweerstand un häd spezifiske Carrier foar phosphatbuunene Deele un C4-Carbonsüüren. Uur düsse Membran wäd uk ju Ionen-Huushollenge fon dän Plastiden räägeld.

Twiske do two Skeelemembranen lait die Intermembranruum (Twiskemembranruum).

Thylakoide Beoarbaidje

Die Intermembranruum is in n Begin fon ju Äntwikkelenge fon dän Chloroplasten noch mäd dän intrathylakoidoalen Ruum (Thylakoid-Binneruum) ferbuunen, die dan fon Thylakoid-Membrane uumesleeten wäd. Die Thylakoid-Binneruum is gjucht wichtich, deeruum dät deeroane bie Lucht ju groote Protonen-Konzentration apbaud wäd - ju Thylakoidmembran mout uut düssen Gruund foar Protonen impermeabel (nit truchläitend) weese.

In ju Thylakoidmembran sunt Faawstoffe oane, do sik nit in Woater lööse: Sowäil two Chlorophylle, dät Chlorophyll a un dät Chlorophyll b, as uk een Carotinoid, näämelk β-Carotin. Truch dät Chlorophyll in ju Thylakoid-Membran kricht dät ganse Blääd ne gräine Faawe, deeruum dät die Faawstof dät gräine Lucht reflektierd: Wan me ne Plonte mäd gräin Lucht beljuchted, kon ju deer niks mäd ounfange, dät wäd aal reflektierd un ju Plonte kon neen Photosynthese moakje. In normoal wiet Sunnenlucht sunt oaber aal do Faawen änthoolden, wierfon bloot gräin reflektierd wäd un aal dät uur wäd in do Chloroplasten absorbierd un kon mäd foar ju Photosynthese bruukt wäide.

Do Thylakoide sunt aal mädnunner ferbuunen, sowäil do grattere Stroma-Thylakoide as uk do litjere stoapelde Grana-Thylakoide. Ap ju twodimensionoale Bielde is dät nit tou ärkannen.

Ju Matrix un wät an litjere Deele noch deeroane lait Beoarbaidje

Ju Matrix, die Haudbinneruum fon dät Chloroplast, is apfäld mäd ne Substanz, ju Stroma naamd wäd. Deeroane lait fibrilläre DNA ju in Dubbelstrange in ju Foarm fon n Kring apbaud is. Dät rakt deeroane mongs uk Koarele fon Primär-Stieuwelse, do deer leegerd wäide un uk wäkke Enzyme.

Äntstoundenge Beoarbaidje

Ju Endosymbionthentheorie kwäd, dät fon eukaryotiske Sällen (Eucyten) ferskeedene Organellen nit uurspröängelk Deel fon düsse Sälle wieren. Do skällen fuul moor fröier oaine eensällige Lieuweweesen weesen hääbe, do dan insen ounfangd sunt, mäd ne eukaryotiske Sälle in Symbiose tou lieuwjen un dan in ju Sälle integrierd wuden sunt. Deerfon skäl uk ju buutere Skeelemembran kuume: Do sunt wäil äänelk as in ju Phagozytose in n Membran-Vesikel iensleeten wuuden. Ju binnere Membran waas ja al in't foaren deer.

Uk Chloroplasten skällen ätter düsse Theorie uurspröängelk oaine Lieuweweesen weesen hääbe, näämelk Cyanobakterien. Uk DNA in Kringfoarm is typisk foar Bakterien. Indizien deerfoar sunt uk Äänelkgaiden in ju ribosomoale RNA.

Bielden Beoarbaidje

  Klik hier foar moor touheerige Mediendoatäie ap Wikimedia Commons.

Literatuur Beoarbaidje

Günther Throm: GRUNDLAGEN DER BOTANIK 2. Auflage NIKOL-Verlag ISBN 13: 978-3-937872-61-2 ISBN 10: 3-937872-61-2